唐唐贊成勞工假12變17

【明報專訊】唐英年同梁振英（CY）兩名特首參選人，噚日又前後腳去民建聯總部出席論壇拉票。民建聯喺今屆選委會選舉取得147席，佔選委數目逾一成，自然成為唐梁二人嘅拉攏對象。據了解，唐唐喺會上同民建聯成員賣口乖之餘，仲搶先應承研究將勞工假同銀行假睇齊，由一年12日變成17日，仲話下屆政府任期有5年，相信每年爭取加多一日勞工假，商界都承受得起喎！


CY同意設「超級局長」建議

唐唐喺會上話，明白唔少民建聯中人都覺得同政府合作係「有辱無榮」，佢承諾上任後會同民建聯「榮辱與共」，吸納更多民建聯成員加入政府架構。向來鍾情茅台嘅政協常委楊孫西喺會上要求對方實行烈酒免稅，出名愛酒嘅唐唐話會積極考慮。


至於有傳同民建聯行得愈嚟愈埋嘅CY，噚日都大讚民建聯係政府好好嘅合作伙伴，亦同意該黨嘅建議，認為下屆政府應增設類似「超級局長」嘅職位，輔助政務司長。佢又喺會上表明，香港應盡快實行國民教育，仲以多年來都被泛民壟斷嘅立法會法律界議席為例，話好多專業人士嘅心態至今仲未回歸喎。


另外，噚日發生咗一段小插曲。話說民建聯為咗恭迎唐唐，要求大廈保安封咗其中一部