【明報專訊】大姐大有時聽到一些新進藝人經常呻冇機會，或者總是埋怨演親都是「二打六」，每日以「HEA」的心態返工，真的好想套用「四哥語錄」：「一把打到你黐埋牆。」沒有人天生就是巨星，做藝人一定要努力，雖然有些藝人可以憑星運走紅，但十萬個藝人中可能僅得一個有這樣的星運，另外九萬九個都係靠自己勤力，肯學肯搏，才捱到有機會做主角搵真銀。無奈的是，太多人只睇到一個有運氣或走捷徑成功的藝人，不會自己做好準備工夫。
大姐大知道無綫與亞視依然有很多二三線及甘草藝人，簽的是一年一騷，或是有底薪但任做的合約，即使已有機會做花旦的姐仔、哥仔，拿的僅是3000元左右一個騷，換言之拍一套20集劇集，僅得6萬元，這就佔去3個月時間，變相月薪2萬元，名副其實「你睇我好、我睇你好」。
早於10年前已經到內地掙「人仔」（人民幣）的張衛健，當年在無綫參加新秀轉移拍劇，一齣《我愛牙擦蘇》加《巨人》，在1993年紅到電影圈，一年拍12部電影，當時成為紀錄，但亦因為有些電影過「爛」，加速他在電影生命短暫，「票房靈藥」頓成「毒藥」，他亦跌入人生谷底。後來健仔返無綫拍《西遊記》做馬騮仔，令他翻身，再來「韋小寶」的助力，令他成為最快攻入內地的香港藝人，現在已可逐步上岸，老婆張茜亦轉做珠寶設計生意，為興趣才玩票拍劇，專心服侍老公。
別以為劇本等如金，送過來他就照拍照收錢，由於他是笑星，大家都對他演的喜劇有所期待，究竟是否好笑，所以他每天都要為自己的演出研度笑話或小動作，有時食飯、瞓覺、發夢都是在研度笑位，又怕不夠好笑，捱的苦可以寫成回憶錄。
雖然健仔不常在港，但他的笑位都沒令觀眾感覺Out，因為BIG FOUR演唱會的搞笑位，大部分都由他操刀，所以東亞等幾家製作公司都密斟他舉行「棟篤笑」，雖有一班老友當然大力支持，不過健仔還未肯應承，因為要在150分鐘（起碼兩個半小時）之內令觀眾覺得好笑，始終很大壓力，他最怕「晚節不保」。由於老友們講明力撐，能在紅館舉行「棟篤笑」是笑星的歷程，講到他心郁郁。
健仔帶過咁多歡笑畀觀眾，大姐大一定買飛捧場，起碼開心笑一晚，好過睇啲豬狼假面具鬥法啦！
2012.02.28
新聞類別
娛樂
詳情#
回應 (0)
