內地上市公司 年報多低級錯誤

【明報專訊】郭樹清做咗中證監主席之後，話要整頓A股市場，講真小琴好同意，特別係當睇過內地嗰啲上市公司嘅年報經常犯上低級錯誤，都夠膽死公布出嚟，換轉響香港發生，真係畀股民鬧到狗血淋頭都似。


好似有間叫江淮汽車嘅A股，份年報明明話向股東「每10股派現2元」，點知第二日又急急出通份告澄清話係「每10股派現1.5元」，咁樣搵股東貼身利益開玩笑，真係多得佢唔少。


仲有一間叫智光電氣，響出年報之前先公布全年業績摘要，但份摘要同年報所列出嘅頭10名持股股東名單，除咗頭兩名之外，其餘8名竟然係唔一樣嘅，唔通佢哋嘅大股東可以喺短短一、兩日出現咁大嘅變化？後來有人發現，原來響年報嗰份名單係同之前一年嗰份一樣，即係話，寫年報嘅工作人員手快快抄咗舊年報，又唔記得改番最新資料而擺出咗個大烏龍。