同月同日同醫院三姊弟「約定」720誕生

【蘋果日報】【奇妙家庭】如果說懷孕是天賜的禮物，80後張氏夫婦KK和Iris的三個子女，必定是他們一生中最驚喜的大禮。三小姊弟分別7歲、5歲及兩個月大，卻巧合於7月20日同月同日、在同一間醫院順產出世。夫妻覺得非常有緣及神奇，直言「難過中六合彩」，而且一切全屬巧合，笑指沒有秘方可以分享。婦產科醫生也指情況超級罕見，稱即使選擇剖腹產子，也難刻意做到。
記者：龔蕙芝　攝影：周子惇
「我（待產陣痛）當時就諗阿仔好醒目，識得一過（凌晨）12點就嚟，真係好神奇」。今年7月20日凌晨，Iris經歷五個多小時陣痛後，清晨在廣華醫院順產誕下兒子以諾。原本再平常不過的生產經歷，卻因7月20日這一天，成為他們一家的命中注定。
爸爸：嗰刻好開心，
即刻同姑娘講
三個都7月20！
懷有弟弟前，Iris已誕下長女天霖和次女千悅，同樣在廣華醫院呱呱落地，更巧合的是，生於2011年及2013年的兩名女兒，均於7月20日出生。Iris記得次女出生當天，夫婦本已預訂自助餐跟大女慶祝生日，豈料當日早上就作動入院，「阿妹遲過預產期嚟，一痛嗰刻係覺得唔會咁神奇啩」。結果兩姊妹真的同月同日生，更沒料到今年再生多個。
決定生第三個，因為「一來我哋兩個各自都係大家庭出身，都鍾意熱鬧；二來都算係老人家意願，想湊個『好』字」。他們去年開展生大B計劃，「原本想生大B（1至4月出生），諗住易啲搵學校」，但錯過了月份，打算放棄時卻得知懷孕，故以諾出生也算「意外」。
「一開始（懷第三胎）覺得唔會同一日出世，直至出咗預產期（7月23日），加上日子越來越近，就越會諗（會唔會又咁巧合）」。廣華醫院婦科醫生更建議她不如在7月20日催生，令弟弟可以和兩個姊姊同日出生，但她拒絕了「當時唔想，覺得要順其自然」。陪產的丈夫KK笑指：「到生嗰刻好開心，我同姑娘講，『我三個小朋友呀！都係7月20日（出世）』」豈料護士冷淡回應：「吓？係呀，恭喜晒。」他還想叫兩名女兒入病房拍張全家福，可惜也被拒絕。
對於這個神奇經歷，Iris直言全屬巧合，沒秘方可分享，反指生次女時，錯過為大女慶祝生日，7歲的天霖曾問她：「你去咗生BB，咁邊個同我慶祝？」其實早於弟弟出世前，天真的小姊妹一直篤定弟弟會7月20日出生，以為生日「有得揀」，「因為我同家姐都係7月20號（生日），哈哈」。細女千悅笑不攏嘴，家姐天霖又大聲搶答：「我想三個一齊過生日！」
媽媽：覺得呢個巧合，
好似多一種連結
令家庭更親密！
蛋糕上由一支蠟燭，變成兩支，未來還要多添一支嗎？兩姊妹已搶着說，應安排三個蛋糕，「媽咪話㗎！」原來兩姊妹過去慶祝生日，都是「商量」買一款蛋糕，但一個愛士多啤梨蛋糕、一個愛公主蛋糕，未來還要和弟弟分享，媽媽已答應她們，將來可挑選自己喜愛的蛋糕，「由一個大蛋糕變三個小蛋糕」。天霖和千悅在旁鬼馬的猛力點頭。
Iris稱：「如果用動物形容，家姐係好似狗咁熱情好動，阿妹就好似貓咁冷靜、唔理人，唔會話同一日出世就一樣性格，細佬就暫時未知。」兩姊妹雖然會爭玩具，但轉頭又會攬頭攬頸，更常常輪流偷親弟弟，「我總係覺得同月同日生呢個巧合好似係多一種bonding（連結），變咗以後呢日，佢哋都要一齊過，令呢個家庭更加親密」，Iris笑說。