Joyce小股東好眼光

【明報專訊】高級零售品牌Joyce（0647）噚日宣布全年業績，全年賺3520萬元，按年勁升10倍（詳見B4版），業績認真靚，令小琴不得不佩服一眾Joyce小股東嘅眼光，事關佢哋早前唔受引誘，拒絕大股東、會德豐集團（0020）吳光正家族提出嘅私有化建議，如今公司業績咁好，噚日收市報0.32元，升3.2％，比起5個月前私有化作價每股0.2元，足足高出60％，所以話，Joyce小股東確係醒。吳光正家族今年2月初時，向Joyce小股東提出，以每股0.2元買番佢哋手上嘅股份，然後將公司私有化，吳氏出價較公司停牌前收市價低11％，亦較公司每股資產淨值低近70％，明顯唔吸引。管理層當日都唱淡公司喺3月底向小股東發出嘅文件，對公司嘅前景講得好差﹕「來年零售市場的前景將繼續充滿挑戰。主要挑戰來自不明朗的經濟環境、品牌競爭及不斷增加的經營成本，尤其是租金成本……本集團預期不明朗經濟環境及潛在業務風險，將會繼續影響其在來年的表現，並以緩慢步伐恢復其增長動力。」公司嘅財務顧問百德能證券亦話，大股東嘅私有化建議合理，叫小股東接受，公司獨立董事委員會亦持此立場。現價高私有化價六成不過，Joyce小股東卻心水清，佢哋未有接納此建議，喺4月中嘅股東大會上，以大比數否決私有化。事後睇番，小股東嘅決定確係醒，唔單止公司嘅業績已證明，前景並非如管理層講嘅咁差，而且股價表現亦遠遠跑贏大市，如果當時接受私有化，家真係揼心口。報料電郵﹕piano@mingpao.com