新聞類別
財經
詳情#
【明報專訊】中國移動(0941)除咗喺股壇上舉足輕重外,未來可能喺世界球壇上亦都會佔一席位。內地《東方早報》報道,中移動同上海申花今個星期三喺內地舉行合作發布會時,場內竟然爆出中移動同埋另一家地位相當嘅大型企業,一齊去收購英超勁旅利物浦,而申花投資者——朱駿則負責出面去收購。
朱駿一直都宣稱,收購利物浦會獲財團幫助,雖然消息人士並無好確切咁講到支持者身分,但就話呢間企業同朱駿喺好多個商業領域都有合作,其中,中移動就好有可能係幫助佢嘅財團之一。
申花投資者朱駿出面
不過,收購利物浦所費不菲,中移動作為大型國企,要實現呢個計劃,自然要經過好多流程,最終結果會點家仍然好難講,所以可能要過多一段時間,先可以知道成唔成事。
其實中移動除咗積極搞4G外,近年都贊助好多運動項目,用來提升公司國際形象,好似網球大師盃同埋一級方程式賽車咁,今次就贊助埋上海申花呢支國產足球隊。話時話,小琴心想,空穴來風未必無因,而中移動早前已斥巨資入股浦發銀行,既然已破戒,電訊公司都可以入股銀行,再下一城,入股埋英超球隊都唔出奇。
報料電郵﹕piano@mingpao.com
回應 (0)
2023年11月26日 15:54