員工睇波 公司大力支持？

【明報專訊】世界上真係有咁體貼員工嘅公司嗎？小琴噚日喺網上睇到一張相片，內容疑似北京某公司內部通告，通知員工有關世界盃特別嘅安排，包括容許員工推遲1個半小時上班；在茶水間提供某牌子飲料，幫助員工提神解乏；又舉行有獎競猜遊戲。 推遲上班時間 睇波酒水全包 不過，網上資訊真真假假，小琴都唔敢百分之百相信。但係張通告寫到似層層，皆因裏面有埋公司嘅職員名稱，如果真有其事，咁呢間北京公司就認真體貼員工，簡直係模範公司，值得某某深圳血汗工廠學習一吓。 嗰張「公司世界盃期間最新通告」，下款公司名稱被塗去，只隱約見到「北京某某有限公司」嘅字眼。通告內容有5項，包括（1）上班時間由上午9點推遲至10點半；（2）茶水間提供添置「X 牛」（小琴故意省去名稱，以免為人做廣告），每人每日兩支；（3）凡巴西隊比賽日，公司將集體去某某酒吧觀戰，酒水全包；（4）舉行有得獎競猜遊戲；（5）若巴西最終奪冠，全公司員工將喺某某酒店吃上一餐。