鄭大班抱恙 缺席匯豐大日子

【明報專訊】匯豐早幾日喺上海舉行匯豐中國新總部的開幕儀式，好不熱閙，明報都有派記者去採訪。不過，唔少行家都發現貴為匯豐中國董事長的鄭海泉，卻未有現身。小琴聽到的消息，話鄭大班身體抱恙，所以上月底倫敦股東會，同上海新總部開幕都冇出席。 日常工作未受影響 大家當然都好想知鄭大班患上什麼病，坊間傳聞不少，但小琴始終無法向當事人求證，無謂諸多猜測，只望鄭大班可以早日康復。 雖然鄭大班抱恙，但聽講他的精神仍然唔錯，而且冇乜影響日常工作，每日仍然見到佢喺匯豐中環總部上班。上月24日，喺香港嘅非正式股東大會，鄭大班亦有出席。但係要坐飛機去英國同上海，始終舟居勞頓，鄭大班喺醫生勸喻之下，未有動身。 鄭大班今年61歲，近兩年不斷傳出他退休的傳聞，但都一一被他否認。現在他既是匯豐中國董事長，又是匯豐台灣董事長，而且係匯豐控股（0005）唯一一名華人執行董事。佢的職務理應要經常穿梭於兩岸及倫敦之間，但願佢快快痊癒，可以繼續為匯豐一眾股東效力。