四叔自爆有人同佢對賭

【明報專訊】四叔李兆基，今年3月曾經開出賭盤，話如果有人證明天匯交易有「假動作」，佢願意1賠100。噚日恒基宣布，大部分天匯單位不成交。有記者就問四叔，驚唔驚畀人話，賣樓無誠信？佢答：「（有無誠信）你知㗎，我都無呃過你呀！」四叔又自爆，早前真係有人同佢賭，仲寄咗幾萬元來，但四叔話唔想賺嗰個人啲錢，所以寄返的錢畀佢，又笑笑口咁話：「佢玩嘢，嗰個（人）玩嘢。」 寄回賭注數萬 笑言對方「玩嘢」 四叔得力助手、恒基（0012） 副主席噚日陪四叔出來見記者，林高演回應有立法會議員指恒基高調公布高價成交，質疑有托價之嫌，林高演話：「一個單位可以托到成個市嘅價，咁就唔係市，大家可以留意山頂聶歌信山道地皮，以及將來豪宅嘅開價，唔係有需求，買家點會願意買，一個單位托到成個市，講都無人信喇！」 今年3月底，四叔曾經喺中環其集團總部大堂向傳媒話，天匯順應買家要求，畀佢哋遲交易。佢當時稱，天匯單位百分百都係市場人士購買，並沒有托價，又稱如果搵到造假，願意「1萬賠100萬」。 佢當日話：「我1萬元賠你100萬元，那你同我賭，如果你話假嘅，你可以同我賭，查出保證賠給你」。 四叔當日話： 「總之保證百分之百，這個物業絕對不是自己人買」。佢又指出，如果係假動作，恒基就應該唔留低手尾，即時交易，免得傳媒不斷追問。如今天匯只得4伙成交，80％單位撻訂，正如陳志雲所講，「真的假不了，假的真不了。」係真係假，相信大家自有判斷。 報料電郵﹕piano@mingpao.com