恒生體貼員工 120吋熒幕睇波

【明報專訊】近期踢緊世界盃，個個都三魂唔見咗七魄，放工趕住返屋企睇波。恒生銀行（0011）為咗方便員工放工睇波，今個星期一就特別開放咗九龍灣Mega Box 辦公大樓嘅多功能活動室，每晚直播兩場賽事，即係夜晚7點半同10點。凌晨兩點半嗰場，就要返屋企睇喇。 一班人睇波，可以一齊嗌，一齊叫先至好玩。而恒生呢個活動室，仲有一部120吋銀幕嘅投影機，可以容納約100個同事睇波。 啤酒汽水自備 恒生話，所有同事都可以參加，即使係星期六、日，同事仍然可以返去一齊睇波。不過，啤酒汽水要自備。究竟有冇員工咁神心，放假專登返公司睇波呢？發言人話未知，因為今個星期先開始呢項安排，預計呢項睇波安排，會開放至7月初。早排小琴問過其他企業，佢哋搞睇波party，都係一兩場賽事，或者聯誼客戶，好似恒生咁開放畀員工睇足咁多場，就真係唔多。有心唔怕遲，賽事仲有成大半個月，如果有其他企業有新猷方便同事睇波，歡迎通知小琴一齊湊熱鬧。