匯豐重現九龍百年舊貌

【明報專訊】今時今日，九龍周街都係銀行，但九龍第一間銀行分行係邊間？又開設於邊度？原來，匯豐銀行喺1929年，係全港第一間過海到九龍開分行嘅銀行，而匯豐首間九龍分行，就係設於尖沙嘴半島酒店之內。半島酒店係香港很有歷史嘅建築物，另一幢歷史建築物，就係與半島酒店為鄰嘅香港前水警總部，即由長實（0001）活化之後、變成家嘅尖沙嘴「1881」。 唔知係咪呢個淵源，匯豐同長實噚日宣布合作，喺「1881」商場，舉辦「九龍百年風貌」歷史圖片展覽，透過由匯豐亞太區歷史檔案庫提供嘅相片同文物，將九龍百年嘅景觀風貌展現人前。 首家銀行於九龍開分行 匯豐集團行政總裁紀勤話：「匯豐約在80年前已在九龍開業，是首間在九龍開設分行的銀行。匯豐和九龍的發展息息相關，在其歷史中扮演重要的角色。」 市民參觀展覽，除咗可以睇到匯豐幾十年前喺九龍嘅面貌，仲可以知道關於九龍街道嘅知識，例如彌敦道以前係叫羅便臣道，為免同港島同名街道混淆，後來先至改名做彌敦道。 而「1881」係香港前水警總部，由1884年到1996年一直採用，物業由5組建築物組成，包括主體大樓、馬廐、報時塔、九龍消防局及消防宿舍。長實喺2003年投得物業發展權，將物業改建為商場同酒店，並且保留部分建築特色，例如有百幾年歷史嘅火爐、原水警總部內嘅羈押牢房。 匯豐呢個展覽於「1881」一樓展覽館舉行，佔地2000幾呎，市民由即日起至2010年9月14日，可以於由早上10時至晚上10時免費到場參觀。 報料電郵﹕piano@mingpao.com 圖片提供：匯豐銀行