恒生搞環保 一年慳600萬電費

【明報專訊】今時唔同往日，家做生意，如果淨係顧住賺錢，其他乜都唔理嘅話，只會令人覺得你一身「銅臭」，對社會無厘貢獻。家好多香港機構，都紛紛追上呢個「企業社會責任（CSR）」潮流，不過唔好以為要搞好CSR，一定要大灑金錢，阻住自己賺錢，睇下香港最大的本地銀行之一恒生銀行。佢哋為咗環保，平時慳慳埋埋，2009年電費開支比起08年足足減少600萬元，條數都咪話唔㩒計。 近年CSR掀起一陣熱潮，不過暫時都係先行者做得比較有聲有色。好似恒生噚日公布佢地第5份「企業責任報告」，佢地搞環保做得都唔錯，榮獲「香港環保卓越計劃」金獎。 仲有啲數字畀大家參考下，好似以全職僱員計，恒生舊年嘅人均溫室氣體釋放量比08年減少4.6%；恒生員工舊年參與義務工作超過1.7萬個鐘，較08年增加逾半；捐獻及贊助各項社會活動的金額超過港幣2900萬元。