前星級分析員卓百德 講帆船心得

【明報專訊】嘉里旗下嘅刊物《臻善譜》，最近一期有篇文章講到，摩根士丹利前星級地產分析員卓百德（Peter Churchouse）今年4月參加咗由香港遊艇會主辦、有50年歷史嘅「勞力士中國海帆船大賽」。比賽起點係維港，終點係馬尼拉蘇碧灣，全線565海浬。原來，卓百德係帆船高手，佢接受該刊物訪問，講述比賽心得。 卓百德家係物業投資公司Portwood Capital主席，佢平時做物業投資，得閒時就玩帆船。佢擁有一隻長64呎嘅帆船，型號係「Custom Warwick 64」，船名叫「Moonblue 2」。 今年嘅比賽有31隊參加，而卓百德嘅「國際讓分際數值」係1.231，排行第7高，最終佢以107小時24分39秒，拿到第15名。 稱中國海帆船大賽具挑戰性 卓百德話，「勞力士中國海帆船大賽」比起較為出名嘅「悉尼霍巴特帆船賽」及英國嘅「Fastnet 帆船賽」，更具挑戰性，因為船隻在南中國海航行時，距離陸地相當遠。開賽時，一般風勢係吹20至30海浬側風，離開香港水域後，海面非常大浪，風向亦變得難測。通常起航後首晚最難捱，就算經驗豐富嘅船員，也不敢掉以輕心。卓百德熱愛長途賽，他認為在海上看着月亮從平靜嘅水平線緩緩升起，那種與世無爭的感覺，不是其他活動可比擬。