中國「航油大王」 自爆獄中兩次痛哭

【明報專訊】講起炒燶嘢嘅中資企業，中信泰富（0267）唔係第一間。早在2004年，喺新加坡上市嘅中國航油，就有兩名職員炒燶期油，令公司勁蝕5億美元。當年中國航油總裁陳久霖因此入獄。去年1月出獄之後，佢本來一直深居簡出，直到最近復出。日前，呢位人稱中國「航油大王」嘅陳久霖，更加到北大光華管理學院演講，仲首次接受媒體訪問，講述自己1035天嘅牢獄生活。 04年因公司炒燶期油入獄 多年不見，陳久霖除咗外表上嘅改變之外 ，名字亦改成陳九霖。佢接受新浪網訪問時話，坐監期間掉過兩次眼淚。「一次是，我孩子12歲的時侯，他一個人坐飛機到新加坡去探監。本來應該我對他說對不起！反而是他安慰我，說爸爸我的成績考得很好，你放心吧！做父親的，處於這種情况，你可以想像當時的感受。但面對他探訪的時候，我沒有流眼淚。而是，自己回到囚室的時候，放聲痛哭了一場。 」另外一次係佢母親逝世，佢回國奔喪時，母親已入土為安，那個時候，佢非常傷心。 自稱不是肇事者 好多人將陳久霖比作令到英國霸菱銀行倒閉嘅「神奇小子」利森（Nick Leeson）。有人喺佢演講時問佢，會否學利森咁，爆中國航油嘅內幕？陳久霖表明，不會學利森，仲話：「我也不會去做這樣的有償演講，我不在乎去賺這個錢。」佢又話﹕「我不會去講我是如何搞垮中國航油的，我沒有資格去講！因為我不是中國航油事件的肇事者！」