巴黎名酒店狂冧中國客

【明報專訊】日前人民幣突然升值，全世界都拍爛手掌。無他，人仔升值，中國人就更加有錢去海外買嘢，奢侈品更甚。難怪巴黎知名嘅高級酒店麗茲（RITZ，順帶一提是英國戴安娜王妃生前住過的最後一家酒店）總經理Omer Acar都話，全球嘅高級酒店業者，都不能忽視中國精英階層，對全球旅遊業嘅重要性。 Omer Acar唔係得個講字，佢早前更加親自去北京、上海及香港考察，以了解中國豪客嘅需求。佢喺香港接受《華爾街日報》特約記者訪問時，大談今時今日，呢家法國名酒店點樣招呼中國豪客。Omer Acar話，佢間酒店家有識講普通話嘅客戶關係主任及翻譯員、餐廳內有中文菜單、筷子提供。「如果客戶用餐時要用壽司做頭盤、然後食烏冬麵，最後食法國甜品，我們不能說不。」 Omer Acar話，中國豪客對酒店最大嘅要求係，安排佢哋去名品牌店掃貨，雖然呢啲名牌喺香港或中國都買得到，但係到巴黎嘅旗艦買，總係更加值得。佢話，有一次有班杭州來嘅中國豪客，購物後坐車返酒店，架車塞滿HERMÈS手袋，好似一間迷你HERMÈS店咁誇張。