大家樂：世盃生意 慘過豬流感

【明報專訊】實在好難想像，世界盃會同豬流感扯上關係，之不過，今回又確係有關係，香江快餐店龍頭大家樂（0341）的一哥陳裕光噚日話，家陣播緊世界盃，對大家樂生意來講，仲慘淡過上年的豬流感。 一哥陳話，早排世界盃踢分組賽，頭場係香港時間晚上7點半，自然少咗人落街幫襯大家樂，晚餐生意便遭打擊。誰知分組賽踢完，連早餐都唔掂，原來家愈來愈多人捱夜睇兩點半嗰場賽事，咁啲市民自然唔多願早起身，結果輪到早餐受打擊。 同時打擊早晚市 佢估計，世界盃期間，大家樂嘅營業額會有單位數字跌幅，而且第2季（4月至6月）嘅業績，有可能同比無法錄得增長。講開又講，舊年呢段時間香江爆出豬流感，對比的基數已經夠低，想不到今年世界盃帶來的衝擊，可以壓到今年6月生意唔升，你話世界盃負面影響力之大，係唔係勁過豬流感呢？ 一哥陳仲話，佢自己都鍾意足球，仲捧巴西隊奪冠，不過佢屋企嘅位置裝唔到有線電視，都冇得睇世界盃，只能透過睇Now新聞時，觀賞吓啲世盃硬照，知悉賽事進展。小琴心想，有線各位大哥唔知收到未，可否幫一哥陳想想辦法，順手爭取佢成為有線客戶。 話時話，其實4年一度的世界盃，搞啲噱頭都唔錯，例如換小禮物等等，好似肯德基送南非小喇叭，便大獲好評。之不過，一哥陳唔多認同呢類橋，佢話唔能夠倚重這類只能催谷短期銷售的手段，換句話，做事都係要想得長遠啲先好。 報料電郵﹕piano@mingpao.com