旺旺二公子晉身董事局

【明報專訊】最近出盡風頭嘅台資中國旺旺（0151）主席蔡衍明，家庭狀况一直是個謎，甚少被曝光。其見報頻率最高嘅長子蔡紹中，舊年7月由旺旺執行董事，調任非執行董事，出任台灣中時集團總經理，以及本港亞洲電視董事等職位。蔡衍明苦心打造中嘅傳媒帝國，多半將交託佢打理。至於食品主業，睇來似將由二仔蔡旺家接班，25歲嘅蔡旺家，噚日起出任旺旺執董。 年僅25歲持1億股旺旺 外界傳聞蔡衍明有7個女人、9個仔女。小琴早先聽蔡生解畫，佢話家共有10個仔女。目前單身嘅蔡衍明，對仔女亦算照顧有加，蔡生舊年10月減持1億股旺旺，聽講就係用嚟送畀仔女做18歲成年禮物。有人話，蔡衍明派畀每個仔女1億股，仔女成年前放喺類似信託基金中，18歲後便能兌現。果然，據噚日旺旺嘅通告披露，蔡旺家持有約1億股旺旺。 不過，蔡衍明一向主張孩子不用升讀大學﹕ 「你讓他們讀那麼多書，我怕他們太自傲。應該有些事輸給人家，有點自卑感，對人家會客氣一點。」大公子蔡紹中2001年從新加坡加拿大國際學校畢業，便進入旺旺開始作實習生，07年成為公司執行董事。 而二公子蔡旺家亦都喺新加坡加拿大國際學校讀書，2003年畢業之後便加入旺旺，先後從事休閒事業部產品企劃、幕僚處經理等，舊年升任集團副總裁兼乳飲事業群總經理。 另外，旺旺又宣布成立「策略委員會」。策略委員會直接向董事會負責，主要職能係為集團持續發展和可持續競爭優勢，制訂中、長期策略計劃，就重大投資及財務決定，以及各方面建設、發展和擴展，向董事會提供意見。蔡衍明擔任委員會主席，蔡旺家亦係成員之一。 報料電郵﹕piano@mingpao.com