任志剛教學生 睇負面新聞要冷靜

【明報專訊】噚日係高考放榜日，莘莘學子離開中學踏入社會，相信喺思想同文化上都會遇到不少新衝擊。前金管局總裁任志剛噚日去到名校聖保羅男女中學教路，同學生講雖然香港每日都有負面新聞發生，但學生哥要停低諗一諗，發掘其背後嘅底蘊，仲話自己都係咁做呢！ 原來任總嘅仔女都喺呢間中學畢業，佢當然對呢間中學好有好感。任總話每日睇報紙見到咁多負面新聞，好容易會感覺香港係一個好差嘅城市，喺度生活同工作都係苦差。作為金融界嘅精英，任總當然唔會咁易被擊倒。佢話每次見到啲負面新聞時，都會深呼吸一下，再客觀咁諗返件事。 睇到負面新聞 先深呼吸再想 其實任總一直都係傳媒嘅追訪目標之一，相信佢壓力都唔細，亦有好多機會要表達看法。佢同班學生講，睇事物一定要客觀，先會令人信服，仲叫佢哋行事為人要做足風險管理措施，小琴相信呢班畢業生聽完任總一席話，真係獲益良多呢！