世界盃搶濠江賭場生意

【明報專訊】世界盃嘅威力認真厲害，無論正行或偏門生意都受影響。點解咁講？小琴日前講過，大家樂（0341）話，近排港人為咗睇波，搞到公司無論晚餐或早餐生意都少咗。原來，6月份澳門嘅賭場生意少咗，部分原因亦可能係因為世界盃。 6月比5月收入跌兩成 據澳門官方數字，6月份澳門賭場嘅總收入為136億澳門幣，比起5月份跌咗20％。德銀發表報告指出，原本6月份前兩周，澳門賭場貴賓廳收入仍然有不錯表現，但係後兩周突然後勁不繼，因此懷疑係世界盃（6月11日開幕）令賭客減少在澳門投注。 瑞信分析員陳偉邦話，世界盃的確有可能影響賭客嘅投注額，過去世界盃期間，澳門賭場收入都有減少嘅現象。不過，另一個原因係6月份本身屬淡季，比5月份減少屬正常。 事實上，賭波嘅風氣都幾厲害，早前香港警方成功搗破一個擁有逾千名賭客嘅外圍賭博集團，涉及1.7億元投注額，係香港警方有紀錄以來破獲金額最大嘅外圍賭博集團。