芬佬：若睇錯市 中環半裸跑

【明報專訊】最近全球掀起一股剝衫打賭潮。阿根廷世盃領隊馬勒當拿、巴拉圭性感女神列姬美（Larissa Riquelme），都話如果自己國家隊奪世盃，會裸跑慶祝；馬來西亞歌手阿牛話，如果佢執導嘅電影喺台灣票房有新台幣5000萬，佢就話裸泳。喺金融界，有位知名嘅老外芬佬都湊熱鬧，話內地A股年底如果仲殘過家，佢會除剩條底褲，喺中環街頭半裸跑。 呢位基金經理叫Aaron Boesky，係總部設於香港、專門投資內地A股嘅基金Marco Polo Pure Investments創辦人兼總裁。Boesky近日接受財經雜誌《Asian Investor》訪問時話，好有信心A股7月已經見底，估計到今年底上證指數會升至3500點至4000點，即起碼有45％升幅；到2012年底更加可升到6000點。（詳細分析可到http://www.asianinvestor.net/ 細讀） 曾膺中國最佳避險基金之王 Boesky喺行內算有名氣，08年獲《Asian Investor》選為「中國最佳避險基金」之王。04年，28歲嘅佢由家族籌集200萬美元，由美國到香港創立純A股基金，4年之內資產值已暴升100倍。佢深諳中國社會人脈之道。喺紐約結識咗當時中國駐美大使楊潔箎，也特地參加中國北京外交學院課程，結識高官。 Boesky嘅家族喺美國華爾街名人，尤其佢堂兄、1986年12月1日美國《時代》雜誌封面人物Ivan Boesky。Ivan喺當時華爾街呼風喚雨嘅交易員， 因為內幕交易勁賺兩億美元，成為華爾街「貪婪」嘅代名詞，後遭判罰一億美元，坐監兩年。後來由米高道格拉斯主演嘅電影《Wall Street》，就係以Ivan嘅故事為藍本。 報料電郵﹕piano@mingpao.com