星展中國吳文誠 「恨」用人仔出糧

【明報專訊】上海作為內地金融中心，好多香港精英都調咗上去做嘢，星展中國董事總經理兼企業銀行部總監吳文誠係其中一員，落滬7年嘅佢，睇住人民幣由當年100蚊港紙兌106人仔，升到而家得嗰87到，不知幾恨一路用人仔出糧，而且非內地居民仲受外匯限制，每年唔可以匯多過5萬美金入境，堂堂星展中國MD吳文誠話，有時真係唔夠使！睇住人仔一路升值，好在吳文誠嘅人工亦直線上升，如果唔係咪變相減薪？而且家佢一家四口都搬去上海一齊住，每年兌到20萬美金，計番大約135萬人仔，雖然上海生活指數已經直逼香港，不過小琴相信佢一家都夠使。礙於非居民身分，吳文誠喺上海無得點投資，佢申報上年已經喺上海置業，睇嚟家已經升值唔少。同樣嚟自香港嘅星展中國副行長兼首席運營官梁徐雁芬話，上咗嚟做嘢最開心嘅就係放假會同其他本地人睇吓畫展同書法，又會周圍發掘上海嘅好去處，增長咗好多文化氣息呢！