阿嬌祖兒夠孝順

【明報專訊】容祖兒及鍾欣桐（阿嬌），早前話購入英皇國際（0163）西環豪宅「維壹」，果然，小琴發現物業剛於日前完成註冊，原來祖兒買咗36樓B室，阿嬌就買咗35樓B室，兩人買入該盤兩個暫時最貴嘅單位，而且都係孖住媽媽開設公司購入，相當有孝心。第日若果兩位小富婆都搬入去住，阿嬌想同祖兒傾偈，「岳」高頭就得；一齊出騷，祖兒大力敲下地板又OK，認真方便。同阿媽合組公司買樓兩個單位都係1591方呎，祖兒與母親余金鳳合組公司，以2339.3萬元（呎價1.47萬元）買入；阿嬌（原名鍾嘉勵）與母親莫寶珠合組公司，以2325.6萬元（呎價1.46萬元）買入。話時話，兩人就是用新成立的有限公司買入，第日如果真係轉手，可以買賣公司股權，令下一手省卻昂貴的印花稅，由於公司新成立，減少準買家對潛在債務的擔憂，通常都幾受市場歡迎。另外，財爺宣布本年4月1日開始，2000萬元以上的豪宅的印花稅，由3.75％提高至4.25％，另不容許買家延至收樓才交稅款，兩位樂壇阿姐都算是全港首批受影響買家，兩人都已經為單位，各自交了約100萬元的印花稅。另外，阿嬌豪宅對下33樓B室（該盤無34樓），則由主要業務是代理護膚品品牌H2O的奧思集團（1161）行政總裁余麗絲以2311.8萬元購入。報料電郵﹕piano@mingpao.com