內地打機國手 人氣媲美黃曉明

【明報專訊】喺內地經營彩票嘅亞博科技（8279），噚日公布同國家體育總局合作，搞咗個全國電子競技公開賽。電子競技賽其實即係打機（電子遊戲），但唔係玩網上遊戲，而係兩個人一齊玩電腦遊戲比併，家已經有足球、籃球電子遊戲，內地仲有代表參加國際賽事。亞博科技主席孫豪就介紹，其中一位國家代表李曉峰，喺內地網上受歡迎嘅程度，媲美內地影星黃曉明。25歲嘅李曉峰係河南人，讀完醫科，仲曾經喺內地醫院工作1年，但最後選擇投身電玩遊戲，家仲成為電子競技國家隊隊長，代表國家參加世界賽。點解電子遊戲會成為國家體育總局嘅項目？體育信息中心副主任楊英話，電子遊戲屬於鬥智活動，好多年輕人鍾意打遊戲機，局方希望引導年輕人用健康方法去玩。加上現時有唔少國際賽，國家都希望培養代表參賽。孫豪話同體育總局有初步協議，會長期合作搞呢類比賽，盈利主要來自贊助，周邊商品、門票、轉播費。據知，集團同體育總局會五五分帳。另外，孫豪又話世界盃期間，佢哋喺內地嘅2500個彩票中心，投注額大增，個別中心一日收幾萬至10萬元人民幣投注。話時話，雖然八爪魚阿Paul估中晒啲賽果，但係孫豪話由於唔少賽果爆冷，相信莊家都賺唔少。