國泰君安范曉微

【明報專訊】國泰君安（1788）日前上市股價潛水，但上市始終係一個新里程碑，值得開香檳慶祝。另一件可能要開香檳嘅事係，舊年曾盛傳遭內地當局調查嘅國泰君安高層范曉微，據聞已經無事，上月底已經返到香港，官復原職。《人民日報》系內嘅《國際金融報》，噚日引述多方消息證實，舊年6月被內地有關部門帶走調查嘅國泰君安證券（香港）有限公司投資銀行部執行董事范曉微，事隔一年，已於今年6月正式上班。 消息人士話，范曉微今年4月完成「配合法院調查」，之後又休假一段時間，6月初到國泰君安香港報到。至於范曉微所涉何案，一直都唔太清晰。有人話，係內地調查銀河證券前總裁肖時慶受賄案時，范曉微被捲入案中。范曉微被調查一事，之所以引人關注，皆因佢係中國證監會前副主席范福春之子。范曉微喺哈爾濱工業大學完成大學學業後，赴英國雷丁大學ISMA中心攻讀金融學碩士，之後一直喺香港工作，曾任職匯豐銀行，05年進入國泰君安香港。