飛入上海心臟新捷徑

【明報專訊】小琴跟好多香港人一樣，周末放假有時都會約三五知己去下東京、台北、上海購物兼食嘢。噚日收到機管局公布，話由今年10月開始，香港每日將可以有4班機飛上海虹橋，而唔使去「冇雷公咁遠」嘅浦東機場，小琴呢類周末遊客，真係舉腳贊成。唔講你唔知，原來香港嘅機管局早前已經接管咗虹橋機場管理工作。虹橋係上海舊機場，位置喺浦西市中心邊陲。若果大家志在飛去上海，去吓新天地、淮海路、南京路及外灘一帶「蒲」吓，飛去虹橋肯定比去浦東方便。虹橋大翻新 加建第二條跑道為咗籌備世博，上海市政府大興土木，翻新虹橋機場，起咗第二條跑道，二號客運大樓幾個月前都已經落成，單計個商場都有40萬平方呎。虹橋一來近市區，二來係日後京滬高鐵、城際鐵路、地鐵嘅交匯地，聽講好多地方嘅機場，都想飛浦東之餘，亦可以飛虹橋。但多年以來，只有日本東京羽田機場同韓國一個二線城市有飛虹橋。至上月中，台北松山都開咗虹橋直航航線。香港要等到10月都已經算係遲，但都好過冇。開初會係香港嘅航空公司飛每日兩班，內地航空公司又飛每日兩班，即係一日夾埋4班。聽講，香港幾家航空公司都想爭開辦呢兩班機。朋友話，港府都會繼續爭取，希望遲吓可以開更多班機。國泰10月底 每日兩班來往羽田國泰前排公布，10月底開始會開每日兩班東京羽田機場嘅航班。同虹橋一樣，羽田雖然舊，但勝在近市區。小琴今後去東京、上海就慳番唔少時間。報料電郵﹕piano@mingpao.com