金至尊搵新代言人

【明報專訊】金飾店金至尊經歷創辦人林世榮突然身故、公司清盤後，金至尊終於成為香港資源（2882）旗下嘅店舖。香港資源接手8個月，金至尊嘅店舖回復正常軌道。噚日香港資源開全年業績發布會，主席黃英豪話今年會有新一輪宣傳攻勢。小琴問佢哋會搵邊位做代言人，執行董事之一嘅徐傳順（徐子淇爸爸）就話，搵內地藝人黃曉明做代言人好唔好？即時有女記者話「好！」，睇嚟黃曉明真係有啲叫座力。金至尊一直搵開陳慧琳做代言人，不過，近期都多咗啲新嘅代言人，例如早排搵咗電影《葉問前傳》嘅主角杜宇航做宣傳。當時徐爸爸都話，電影《葉問》喺內地收得，相信透過《葉問前傳》宣傳，都可以幫助佢哋開拓內地市場。今次徐爸爸諗住搵黃曉明，似乎都想針對金至尊喺內地245間分店嘅宣傳。上年宣傳費逾千萬首飾店不時搵藝人做宣傳，咁究竟要使幾多宣傳費呢？根據香港資源首席財務官黃詠茵話，佢哋舊年花咗1300萬元做宣傳，大約佔營業額1％。不過舊年7月香港資源先至正式接手，黃英豪話舊年上半年由清盤人監管公司運作，清盤人花喺廣告宣傳嘅費用唔算多。