淺水灣道「星屋」22萬租出

【明報專訊】小琴收到代理報料，話日前剛促成淺水灣道32號C屋嘅租約，面積3200方呎，4房開則，連一車房，以全包月租22.5萬元成功租出，呎租達70.3元，係該區近期最大宗租務成交。小琴翻查資料發現，間屋業主係股壇顯赫有名嘅新世界發展（0017）執董、美麗華酒店（0071）副董事長冼為堅。另外，該屋苑業主及住戶，更加係「星光熠熠」（見表）。業主為冼為堅 名人做鄰居冼為堅除咗係新世界及美麗華嘅開國元老級人馬外，亦曾任恒生（0011）獨立非執董，舊年才與新世界彤叔，一同喺恒生退落嚟。年達八旬嘅冼為堅，亦持有該屋苑D屋。事實上，該屋苑主要由新世界高層持有。而租入C屋嘅租客，日後亦可與報住B屋、近日與官府就「9招12式」不斷過招嘅地建會執委會副主席梁志堅為鄰。地產界中人都知道，地建會堅叔無甚架子，天南地北無所不談，新租客搬入後肯定獲益不少。至於建築界無人不識嘅唐玉麟博士，則是E屋業主，佢曾經係麗新發展（0488）出任執董及麗豐控股副主席。新世界總經理，其後過檔。另外，證監會主席方正及夫人、前行會成員方黃吉雯則持F屋，據悉用作收租。利嘉閣壽臣山廣場分行助理區域經理邱景賢表示，港島南區本月大額租賃成交頻繁，連同上述成交在內，該行本月至今已經錄得3宗月租逾20萬元嘅租務，當中兩宗屬於洋房類型，洋房租金現水平已較去年底上升約10%，相比同期分層單位租金升幅5%至6%為多。報料電郵﹕piano@mingpao.com