國際雜誌Monocle落戶灣仔

【明報專訊】近年有愈來愈多外國品牌打入香港，國際事務雜誌Monocle都喺香港落地生根。投資推廣署話，Monocle最近租咗灣仔星街附近嘅地舖，作為雜誌嘅亞太區採訪總部及零售店，舖位噚日正式開業。舖位前面賣衫 後面編輯部2007年2月創刊嘅Monocle，總部設於倫敦，集中討論國際事務、商業、文化同設計，屬於高檔嘅媒體品牌。作為一個媒體品牌，Monocle嘅嘗試可謂非常特別，舖位嘅前半部係賣流行時裝，後半部先係雜誌嘅中國同亞太地區採訪總部，由駐香港記者Liv Lewitschnik主理。據聞呢種經營方式，係為咗利用從零售部分獲得嘅利潤，支付雜誌採訪營運成本。香港係Monocle最多讀者及訂戶嘅其中一個市場，繼倫敦、洛杉磯同東京後，香港係佢哋第4個有設立零售店嘅城市。Monocle落腳嘅街道名字亦好特別，中文名叫進教圍，英文名叫St. Francis Yard，係灣仔日街、月街附近一條窄街，物業數量唔多，所以唔係好多人識。小琴向地產界朋友打聽，得知Monocle租緊嘅舖位，位於灣仔進教圍1至4號寶豐大廈1號舖，建築面積750平方呎，實用面積530平方呎，每月租金約5萬元，屬於市值水平。