世盃踢完 濠賭翻生

【明報專訊】世界盃踢完，英超又未開鑼，呢段時間賭徒們多少會有啲失落。可能係因為咁，澳門賭場7月份生意大旺。噚日，有3間大行，包括德銀、里昂以及花旗，齊齊出報告話，由於世界盃完結，賭客重臨濠江，故此7月份澳門賭場好旺，估計全個月收入會比6月回升20％，按年更加有七、八成升幅咁話。噚日啲濠賭股份已經起舞，銀河娛樂（0027）、永利澳門（1128）及澳博（0880），分別升4.4％、2％及1.6％。估計七月賭場收入按年升八成上個月小琴講過，世界盃開鑼之後，澳門賭場嘅生意明顯減少，6月份整體賭場收入為136億（澳門幣．下同），比5月份跌20％。德銀指出，原本6月份首兩周，澳門賭場貴賓廳收入仍然有不錯表現，但係後兩周突然後勁不繼，懷疑係世界盃（6 月11 日開幕）令賭客減少喺澳門投注。噚日德銀再發表報告話，根據佢哋嘅了解，7月截至19日澳門賭場收入已經有99億元，即係等於6月份嘅72％，估計成個7月份收入可達165億元，比6月份回升21％，比09年7月更加會升80％咁多，與今年5月嘅170億元歷史紀錄接近。升得咁勁，主要係因為世界盃完結，賭客回流濠江，里昂、花旗亦有類似嘅講法。講開又講，根據香港警方嘅數字，今屆世界盃期間，本港警方拘捕200多人，檢獲5億港元投注紀錄，內地公安及國際刑警亦破獲逾800個外圍波集團，連同本港，總金額涉及近百億港元。報料電郵﹕piano@mingpao.com