匯豐沽交行？ 一場誤會！

【明報專訊】噚日小琴一起身睇新聞，聽到有電子傳媒報道，獅子銀行（匯豐，0005）減持大陸合作伙伴交通銀行（3328）股份。小琴乍聽覺得好匪夷所思，明明匯控一直都渴望增持交行呢個寶庫。不過，港交所嘅權益披露一欄顯示，匯控上星期五（16日）持有交行嘅長倉，的確減少咗1.44億股，每股平均價係5.14元，正正係交行早前嘅供股價，較交行現價8.62元相差大一截！究竟發生咩事呢？幫未行使供股權股東掏腰包小琴打聽之下，真相大白。原因在於匯豐嘅雙重身分。匯豐除咗一直係交行嘅策略股東，交行供股期間，匯豐都同時係佢嘅包銷商。操作上，若交行嘅其他股東，例如陳師奶或李小姐，冇行使供股權，包銷商有責任承包陳師奶同李小姐嘅供股權，亦即掏腰包幫佢哋供埋股。於是，交易所就預先將呢啲股份納入匯豐名下，令到匯豐看似增持咗交行咁（見6月6日權益披露），到供股完成之後，就將呢啲股份從匯豐名下剔出，變咗匯豐好似減持交行咁，亦都令記者行家擺烏龍。實際上，匯豐已斥資79億元悉數供股。發言人話，匯豐對交行持股由供股前嘅19.01％微增至19.03％。匯控近年非常重視內地嘅黃金發展機會，想增持都嚟唔切，又點會無端減持，打爛金漆招牌呢！