龍蝦大王謀東山再起？

【明報專訊】前稱漢寶集團（龍蝦大王）嘅中國能源開發控股（0228），噚日宣布以441萬元，出售旗下嘅中式酒樓業務景逸軒。小琴發現，買家係公司嘅前大股東、漢寶集團嘅創辦人張道生等人，張道生舊年已經向中能購入咗京華酒樓，家又買埋景逸軒，莫非想東山再起？

中能嘅通告話，將出售景逸軒畀成捷有限公司，小琴追查之下，發現成捷嘅董事包括陳能照、 張林美德、張道生、吳永波、佘慶潮，呢啲人全部都曾係漢寶集團（龍蝦大王）嘅執董，即係張道生嘅班底。

漢寶班底 購回景逸軒

漢寶嘅創辦人之一張道生，早於1986年與友人喺土瓜灣開設首間酒樓，首創以「龍蝦大王」作招徠，令酒樓名噪一時，而集團也迅速地擴充，2002年2月上市，成為當時最大嘅酒樓股。2003年連鎖店數量高達18間。

名氣雖盛，仍然敵不過2003年SARS嘅低潮，集團由高峰一下子滑落，06年嘅中期業績顯示已剩下5間酒樓。之後張道生更加賣盤，轉型變能源股，改名中能控股，而張道生則於2006年6月離開中能。

據漢寶集團網頁，現時屬下6間分店為﹕土瓜灣漢寶酒樓、漢寶皇宮酒樓、京華酒樓、京寶海鮮酒家、景逸軒及皇室堡景逸軒。

報料電郵﹕piano@mingpao.com