傳鄭家純買《新報》

【明報專訊】噚日有周刊指出，新世界發展（0017）董事總經理鄭家純，正向英皇集團主席楊受成洽購《新報》，因為純官希望辦一份為地產商發聲、力保功能組別嘅報紙。小琴睇到，第一時間致電相關各方求證，但楊生實在貴人事忙，其助手接聽電話，指「楊生打緊牌，唔得閒回應」。

新世界新報皆不評論

對於純官是否準備買新報，新世界發展執行董事梁志堅接受查詢時回應︰「真係唔清楚。」新世界發言人關則輝話︰「鄭生表示不想評論。」而新報社長胡雪麗說︰「我只能說，直至現時，董事會未有任何指示，報紙一切運作如常。」

楊受成昨天被人問到鄭家純係咪洽購新報時，笑住口咁話，「我每日都傾緊好多生意啦」，睇嚟佢都算係默認。

至於報道純官買新報嘅《東周刊》，喺文章劈頭就話︰「報業又起風雲！」報道指出，純官除咗想辦一份「維護地產財團及商界利益、為新世界發聲的報紙」，更可能將新報改為一份免費派發嘅財經報紙，而且洽購已接近完成。至於純官做乜突然咁神心搞報紙﹖報道就話，純官近年因「梁展文事件」、「紅灣半島風波」等事件，被立法會及傳媒窮追猛打，佢身邊嘅智囊於是獻計，畀人鬧不如自己搞，收購一份報紙，希望奪回部分輿論陣地。

變免費財經報 幫地產商發聲

報道又指出，純官欲染指傳媒，如意算盤是拉攏其他三、四家地產商加盟，而且早前佢已向中央政府打過招呼，提出辦報嘅想法，據說中央並不反對，佢於是加速去馬。

而替純官出面洽談收購大計嘅人，正是純官「政治顧問」、喺新世界負責公共事務嘅資深傳媒人曾景安。

報料電郵﹕piano@mingpao.com