《法網群英》為保廣告

【明報專訊】亞視日前播新劇《法網群英》，收視如何暫時未知。但小琴聽聞口碑都唔錯，有網友更喺友台討論區，讚《法網群英》好睇，「金牌監製」鄧特希果然厲害。如果觀眾錯過咗第一集，想網上重溫？唔好意思喇，只有半集可以睇，真係到喉唔到肺。

無綫電視都有myTV，可以網上追番晒啲劇集，點解亞視咁孤寒，唔足本播放呢？亞視中人話，佢哋都好難做，因為網上播晒全集嘅話，觀眾可能會睇網上版，唔睇電視版，咁就會影響廣告收益。佢話呢套劇吸引咗唔少廣告，都希望成為招牌作品，幫亞視一洗頹風。

亞視今日又有官司，又係股東之爭，股東蔡衍明控告查懋聲、準股東王征。記得上次官司，律師披露亞視財政情况唔多穩定，第二日即刻有廣告商詐形，要當時嘅行政總裁胡競英急急出嚟澄清。唔知今次官司，又會唔會搶咗新劇收視呢？