宏霸數碼 拆細股份被否決

【明報專訊】華懋慈善基金揸住22.99％股權嘅宏霸數碼（0802），噚日喺馬來西亞舉行股東特別大會，審議將股份1拆20嘅議案。結果，議案被股東否決，反對股數的比率高達58％。未知是否華懋慈善基金發威，阻止以陳振聰軍師朱偉民為首嘅管理層，將公司股份拆細。

噚日投反對票嘅股數有6385萬股，佔出席投票嘅股數58.03％；贊成股數4618萬，佔41.97%。小琴翻查資料，華懋揸住宏霸總股數約6566萬股，比起噚日反對股數多咗小小。如果噚日反對嘅股數全部來自華懋，小琴唔明點解華懋要留番小小股數沒投票。

小琴噚日打電話問宏霸，佢哋話要公布嘅資料已公布咗，冇嘢可以補充，而華懋慈善基金方面，噚日未能聯絡上，事關總部接線嘅員工話，已經過咗辦公時間，叫小琴第二日再打過。