陳啟宗：IR最容易做

【明報專訊】恒隆地產（0101）新任CEO陳南祿（洋名Philip），噚日首度公開現身。喺恒隆業績記者會上，主席陳啓宗讚Philip對公司好有貢獻，而Philip就話好佩服恒隆嘅遠見，兩人互笠高帽。喺Philip上任後6日，負責恒隆「投資者關係（Investor relation）」及租務嘅吳士元（Terry）辭職，陳啟宗睇來並唔擔心有影響，佢形容Terry負責嘅投資者關係，係公司最容易做嘅事。

陳啓宗話﹕「IR（Investor relation）係公司中最容易做嘅一部分，唔係好難做，當然無可否認，吳生（吳士元）確實做得唔錯，做得很好，但係呢方面嘅事情絕對不複雜，如果你話見傳媒，Philip搞掂喇，Philip同傳媒嘅關係一向很好。」小琴噚日試過搵Terry，不過佢手機冇人聽。

Terry喺離職前，曾行使恒隆嘅認股權，並極速套現勁賺過億。噚日記者問陳啟宗Terry是否用晒認股權？陳啟宗回應：「你去問佢啦！」陳啓宗又話：「我好希望我嘅同事發達，因為佢哋發達我才能發達，大家都好。公司規定股票期權係你嘅就是你嘅，你點樣做係你嘅事。」

與陳南祿互送高帽

至於Philip，佢噚日全場笑容滿面，話返工9個工作日來感覺非常之好，對公司策略和遠見都非常認同，公司長線睇法一直都係很佩服，佢形容，恒隆團隊多年來做嘅工作，都很有成就。

陳啓宗就勁讚Philip：「其實，Philip已經有貢獻了，好多貢獻添；有佢嘅見地，好多嘢係我沒諗過。」

報料電郵﹕piano@mingpao.com