法巴珠珠小休 赴日做交換生

【明報專訊】「法巴輪后」趙海珠（人稱珠珠）嘅粉絲們，未來幾個月可能會有啲失落，事關佢哋會有4個月嘅時間聽唔到珠珠把聲。珠珠向小琴透露，佢今年9月至12月會停薪留職，到日本進修之後再返法巴繼續打拼。

科大讀MBA 將停薪留職

珠珠為咗自我增值，舊年報讀香港科技大學嘅工商管理碩士課程（MBA）。珠珠話個課程包括一個交換生嘅部分，可以揀去唔同國家做交換生，佢就揀咗去日本新潟嘅International University of Japan ，讀完之後會再返公司做嘢。小琴對珠珠選擇去日本進修一啲都唔奇怪，事關佢大學時主修日本研究，日文好掂，對東洋好熟悉。

珠珠家係法國巴黎銀行股票及衍生產品部聯席董事，佢係記者出身，2004年開始喺無綫電視翡翠台及銀河衛視新聞台（現稱為無綫收費電視無綫新聞台）報道新聞，由於樣靚聲甜，好快就成為全城嘅人氣女主播。

正當人氣正旺之際，珠珠決定轉行。2007年初加盟法巴窩輪部，當時傳聞年薪過百萬，成為一時佳話。憑住佢嘅人氣，珠珠好快成為法巴窩輪部生招牌。2007年6月，網上曾有傳聞指趙已向法巴呈辭，並將返回無綫，後來佢澄清只係傳聞。

之後將重返法巴

09年1月，金融海嘯之下，證券行紛紛裁員，當時法巴喺亞洲區亦裁減近50名員工，本港亦有受牽連，主要涉及外匯、投資銀行及衍生工具部門，當時好多人都諗珠珠會唔會受波及，後來佢安然無恙，證明佢本身有「食力」。

報料電郵﹕piano@mingpao.com