IQ博士信用卡 博士被飛出局

【明報專訊】係人都知，大新銀行（2356）發行信用卡，好有特色，現時喺香江嘅發卡量已達70萬張，認真唔嘢小，而且大新一向鍾意發行卡通信用卡，什麼Hello Kitty、史諾比等等，最新推出嘅係IQ博士系列信用卡。

雖然年齡係女人最大嘅秘密，但係小琴都唔怕認，IQ博士真係陪住小琴長大，當年三色台首播，由剛獲新秀冠軍梅艷芳主唱嘅粵語主題曲，記憶猶新，兼且IQ博士同一般卡通片好唔同，不再是愛心滿地球，抑或超人打怪獸，相反係頗有成人卡通Feel，毫不諱言人性陰暗面，例如，IQ博士見到山吹老師時，便會流晒口水，但嚴肅時候又變做靚仔樣等等。

不過今回大新發行嘅IQ博士新卡，一共四款，1款係小雲、2款係小雲加小吉、1款係小吉成日篤住嗰一舊糞，偏偏IQ博士卻沒有上榜。原來大新都唔求其，一早做定市場調查，發現客戶在IQ博士諸多人物中，最喜歡嘅人物分別係小雲、小吉、舊屎，反而IQ博士並非最首選，所以今批卡通信用卡，就無IQ博士份。