煲呔去英國賀寶哥哥娶新抱

【明報專訊】小琴噚日爆料，話東亞銀行（0023）二公子李民斌（洋名Brian）聽日就小登科。原來我哋特區首長「煲呔曾」，都會越洋出席Brian喺英國的婚禮。不過大家可以放心，煲呔唔係做緊佢份工嘅時候飛去英國，而係喺放緊大假期間，抽時間去賀賀李國寶娶新抱。

李家今次娶新抱認真大陣仗。小琴噚日已經講咗，除咗聽日喺英國舉行婚禮之外，下個月初亦會返來香港擺酒大宴親朋。除咗英國同香港之外，原來一對新人喺下個禮拜亦會去到風光明媚嘅西班牙巴塞羅拿搞一場大騷。另外，因為新娘係新加坡人，稍後喺新加坡亦會有一場婚宴。

4地方搞婚宴 走勻全世界

嘩，即係大大話話一個婚禮，會移師4個不同地方慶祝，真係好似人哋新股上市要走勻全球一樣，Brian今次十足十要搞個「Roadshow」婚禮。喺英國、香港、新加坡搞大家都好明白，點解又要去巴塞羅拿呢？有人就這樣猜測，除咗一對新人可能鍾意嗰度嘅地中海風情外，寶哥哥交遊廣闊，東亞今日仍然係李家天下，多得最大單一股東西班牙銀行La Caixa支持，娶新抱咁高興，當然也應該預埋西班牙老友一份。

老記噚日就特區首長喺咪會去英國賀李國寶娶新抱一事，問特首辦發言人，發言人嘅回應係「這些屬私人事務，不作回應」，只說特首會喺今個禮拜日重新上班。