耀才搵靚女網上講股

【明報專訊】近來證券行受惠滔滔北水，加上被大陸證券行併購嘅消息接踵而來，券商股備受資金追捧。有15年歷史嘅華資經紀行耀才證券，亦打算月底上市，近排力谷生意。除咗1個月內狂開5間分行，極速將覆蓋網絡翻一番之外，仲破天荒推出24小時網上財經電視頻道，搵埋靚女主播王卉霖，同「人氣」專家郭思治主持節目，吸引粉絲。

傳聞月底上市 本月勁開分行

噚日耀才證券銅鑼灣新分行開幕，主席葉茂林出席剪綵，成日幫傳媒更新IPO孖展額嘅行政總裁陳啟峰，同埋成日喺「公仔箱」現身講股嘅市務總監郭思治都在場。小琴就把握機會，問吓上市大計。事關耀才剛剛通過咗港交所主板上市聆訊，據聞會喺今個月底上市。不過葉主席基於家係敏感時期，對提問三緘其口。

但喺籌備上市前夕，葉主席就極力催谷生意。本來耀才喺全港僅得5間分行，分佈喺中環、旺角、深水埗區，半年前開咗荃灣分行，8月內都會喺九龍、新界各區插旗，包括觀塘、大圍、大埔、上水同元朗。葉主席透露，其實好多分行已經營運緊，未來會陸續正式開張。

另一新噱頭，係下個禮拜二開台嘅網上財經電視頻道。已經喺財經界打滾30幾年嘅郭思治話，以佢記憶所及，佢哋係首間開設財經頻道嘅經紀行。仲搵埋幾位靚女主播包括落選港姐王卉霖，同埋財經專家主持節目，節目內容涵蓋國際、開市前部署、問答等。郭Sir當然都會擔大旗，忙多一瓣。不過作為股壇健美先生嘅佢，仍然堅持每日做Gym，但就要等到夜晚10點先做得咁話。

報料電郵﹕piano@mingpao.com