冼國林夫妻檔搞國藝

【明報專訊】前身為慧峰集團之國藝控股（8228），今年起轉型發展電影製作及創意工業。早前，國藝已經搵咗詠春高手冼國林，出任主席及執行董事。噚日，國藝又再委任冼國林太座羅寶兒，出任公司執董，等冼國林呢對夫妻檔可以夾手夾腳搞好公司。

據公司通告，冼太今年31歲，「擁有豐富的娛樂、藝人管理及電影製作行業的經驗。羅小姐（羅寶兒）擁有多年的銀行經驗，專門從事風險管理。」國藝畀冼太年薪36萬元，而冼國林年薪則有96萬元，冼國林兩公婆共持有國藝5.23％股權。

冼國林喺國藝揸fit之後，頭炮係拍攝《葉問前傳》。冼國林早前曾經話過，現正籌備另一套葉問電影，同時計劃開拍兩部動作片，一部時裝片，一部民初片。