如烟靚模室內抽「煙」

【明報專訊】獲周星馳「前度」紅顏知己于文鳳入股嘅電子烟公司如烟（0329），噚日喺中環IFC搞咗個記者會，高調咁宣布改名為叁龍國際。為加大宣傳效果，集團主席王彥宸話唔單止親自示範食電子煙，更加搵嚟一大班性感模特兒，於會場集體「吸煙」。會場瞬間煙雲四起，當小琴以為叁龍以身試法，測試香港室內禁煙法例之際，卻發現原來模特兒口中嘅香煙，係不含尼古丁嘅電子煙，喺香港唔算係煙仔，因此冇犯法。

如烟之所以要改名，係要畀大家知，經過股本重整之後，叁龍已經還清咗1.8億債項，經營情况有改善。不過，電子煙仍然喺叁龍主要業務，而模特兒試食霧化電子煙，已經係美國拎咗專利，煙頭裝有LED燈，煙嘴有霧化器，所以模特兒每吸一口電子煙，便會吐出一圈煙雲，疑幻疑真。

主席稱無見過于文鳳 對方無意做董事

集團主席王彥宸話，集團改名之後，會專注發展新產品，開發新市場。王彥宸講吓講吓，又吸咗幾口電子煙。佢又話：「全世界的煙民保守估計有13億人，電子煙為煙民提供一個新選擇，潛力無限。」不過，小琴提醒有興趣嘅讀者，香港法例禁止尼古丁電子煙，而叁龍現時亦未有喺香港售賣不含尼古丁嘅電子煙。

盛傳與周星馳分咗手嘅于文鳳，之前大手掃入叁龍，成為第2大股東。原來，王彥宸由此至終都無見過于文鳳，于文鳳亦無打算加入董事會。據王彥宸所知，于文鳳睇好電子煙前景，經中間人介紹入股叁龍。莫非，于小姐閒來無事，都會與三五知已，一齊吸電子煙？

報料電郵﹕piano@mingpao.com