霸王CEO登門道歉

【明報專訊】霸王集團（1338）近期風風雨雨，早排被指洗頭水含有二噁烷，雖然內地藥監局已經證實二噁烷含量未超標，但股價已經重創。除咗股價之外，公司形象亦都大受影響。有霸王員工去上海《每日經濟新聞》報社總部踩場，搞到霸王集團首席執行官萬玉華，前日要親自出馬，登門同報社道歉。

話說霸王洗頭水引起二噁烷疑雲，後來《每日經濟新聞》進一步深入採訪，發現霸王產品存在批件問題。根據《每日經濟新聞》報道，7月30日一名自稱「霸王」上海公司經理嘅男人，同行仲有三名男人，去到上海報社踩場。佢哋圍堵報社門口，唔畀報社人員返入辦公室。滋事分子又不時踢打報社大門，同鬧報社員工。後來記者報警，警察到場將當事人帶走調查。

指會嚴肅處理鬧事員工

呢件事引起好多批評，霸王集團首席執行官萬玉華就出面解圍，前日專程去報社道歉，仲話會有書面道歉。萬玉華承認滋事者係霸王員工，並指佢哋衝擊報社，係唔正確嘅行為，集團會嚴肅處理呢批員工。而集團會汲取教訓，教育員工正確對待媒體。《每日經濟新聞》報社負責人話，霸王集團嘅道歉雖然姍姍來遲，但霸王認識到自己嘅錯誤，並願意改進，報社表示歡迎。

早前北京《經濟觀察報》記者仇子明早排發表文章，質疑浙江凱恩股份有限公司喺上市過程，涉嫌非法侵佔國有資產。仇子明被凱恩公司所在地遂昌縣公安，以「涉嫌損害商業信譽罪」全國通緝佢。後來遂昌縣公安局副局長赴京，向報社及仇子明道歉，而霸王今次亦都同報社道歉。希望呢啲例子話畀各大企業知道，要處理公司危機有好多方法，用暴力或恫嚇方法對付傳媒，就肯定唔係好方法。

報料電郵﹕piano@mingpao.com