于文鳳緋聞男友買股仔

【明報專訊】周星馳「前度」紅顏知己于文鳳，憑入股叁龍（0329，前稱如烟），名字瞬間喺財經界響噹噹。不過，佢緋聞男友、創興銀行（1111）第三代太子爺廖駿倫（又名廖堯城），喺財經界都亦唔喺等閒之輩，唔單止早前幫于文鳳入股叁龍做供股分包銷商，最近更加自己出手，以差唔多3億元，掃入同樣係細價股嘅民豐（0279），莫非拍拖之後，打算雙劍合璧，齊創股壇奇蹟？

兩日帳面賺千萬

廖駿倫用個人名義，以2725萬大手掃入民豐新股，仲買埋民豐價值2.75億元嘅兩年期零息可換股債券，估計如果批債券全數轉為股份，連同已經購入嘅股份，廖駿倫至少有八成股份，喺集團單一最大股東。之不過，點解廖駿倫對呢間做投資公司嘅細價股咁有興趣？真係不得而知。但廖駿倫前日以每股0.275元買入之後，民豐股價已經連升兩日，升到噚日價位0.38元，累積升咗21％，未計債券，帳面已經至少賺1000萬。

廖駿倫之前幫叁龍的供股做分包銷商，同于文鳳拍住上。「于文鳳效應」曾經亦令叁龍大升，不過之後又大跌，噚日仲跌到0.085元，低過于文鳳嘅入貨價。唔知民豐會唔會步叁龍後塵？

創興：私人行為 不會理會

話說廖駿倫，並唔喺一個普通嘅太子爺。佢出名財技犀利，家喺私募股權投資公司Unitas Capital Asia Pte. Ltd.做執行合伙人兼行政總裁，亦於1990至1997年間出任大摩亞洲總裁兼董事總經理。廖駿倫亦同時兼任創興銀行（1111）非執董，但佢喺家族生意似乎只喺閒角一名。創興銀行副行政總裁劉惠民被問及廖駿倫入股一事時就話，廖駿倫平時都唔參與銀行業務，加上投資屬私人行為，董事會唔理會咁話喎。

報料電郵﹕piano@mingpao.com