港台集團衰衝動 向證監道歉

【明報專訊】主要從事製造體育及運動鞋類產品嘅港台集團（0645），前日（10日）發出通告，公開向證監會道歉。點解會咁？事關公司管理層太過衝動，喺發出股價敏感消息通告之前，未有將通告先畀證監執法人員過一過目就出咗街，違反咗上市條例。

港台集團8月5日發出通告話，大股東李志強（持有約60％股權）通知公司，有獨立第3方洽購佢手上部分或全部股權，即係話，公司控股權可能易手。呢份通告出街前，未有先畀證監會企業融資部執行董事審批，違反咗收購守則第12.1條。港台話，事件並非故意，公司已向執行人員致歉，並且保證將來要以謹慎嘅態度，處理任何收購收守則相關事宜。

小琴翻查資料，原來「股壇長毛」David Webb係港台嘅重要股東，持有1705萬股或5.01％，市值2011萬元。阿Webb出名熟悉上市條例，小琴覺得港台董事應該請教吓佢，睇吓點樣可以避免再違規。