賣粥好搵 老闆細屋換大屋

【明報專訊】數十年前香港經濟發展落後，窮人只能夠住細屋、為咗慳米煮飯仲要經常吃白粥；但係時至今日嘅富裕社會，有唔少愛吃粥嘅人士未必係窮，只係為咗減肥收身而食得清淡一啲，又或者被粥店提供花款多多嘅粥餐吸引而去光顧。之但係，原來現時賣粥人士都好發，好似海皇粥店老闆之一嘅蔡汪浩，住喺沙田九肚山嘅「皓朗山莊」兩年，似乎嫌間屋細，寧願畀多啲錢換間大屋。

代理朋友爆料，現為海皇執行董事嘅蔡汪浩於08年8月，以2400萬元買入皓朗山莊2980呎嘅28號屋自住以來，佢嫌間屋太細，喺今年3月以3680萬元再買咗3880呎嘅2號屋，仲要花費不菲裝修，近期差不多可以入住；但佢喺本周一，就以2800萬元賣咗28號嘅細屋，帳面賺成400萬元，相信賺價可以補到間2號大屋裝修費有餘。

至於買入蔡生28號屋嘅買家，原來係一名喺東莞開設染廠嘅本港廠家，本來原住緊大埔「聚豪天下」其中一幢建築面積5696呎嘅55號董事屋，或者佢又嫌間屋太大住唔晒，諗住第日搬去皓朗山莊28號屋住；所以上個禮拜以4200萬元賣咗現住間董事屋，較佢喺2004年4月以2700萬元買入價帳面賺1500萬元。