【明報專訊】不斷添丁的「小小超」李澤楷，似乎又再醞釀緊新生命，不過今次隨時要搞幾年先至會出世，因為講緊嘅唔係製造人仔，而係一家全新的上市公司，業務開正小小超最喜歡嗰瓣，就係傳媒業，其中嘅核心資產，應該就係《信報》。
有消息人士同小琴講，為咗同路透和彭博鍊過，小小超私人擁有的英文財經通訊社CAI（公司全名CAI Business Indepth Limited，中文叫財庫智慧有限公司），上月底向同事派bonus option，話明日後當CAI又或者CAI的控股公司上市，就可以換股。
而另一人士向小琴透露，CAI高層曾向個別受惠員工講明，日後IPO的控股公司，又點止得CAI一項資產咁簡單，好大機會包括小小超直接或間接控制的傳媒，其中最主要的兩項就係《信報》同埋now寬頻電視，咁呢間上市公司到時既有客戶過百萬的收費電視，又有傳統財經報章，仲有想專門服侍基金的CAI，睇落似樣好多。有人仲估定先，話呢個小小超的傳媒新生命，IPO時的估值可以達到四五十億元咁話。
不過，now電視目前由8號仔電盈揸住，要同小小超私人擁有的傳媒資產綑綁一齊上市，涉及關連交易，隨時要過電盈小股東一關，咪話一定順風順水。
而且三項資產當中，目前除咗《信報》估計有錢賺外，CAI面對強大的對手，固然未知幾時有得賺；now都係去年下半年至開始有3800萬元EBITDA（即未計利息、稅項、折舊及攤銷前嘅盈利），今年失去英超，未知是禍是福，睇怕仲要努力多兩三年，至可能會有讓投資者信服嘅track record。
賓架：要守多幾年再講
所以，有中環賓架估計，即使小小超團隊係sell故事的高手，也要守多幾年，證實個business model真係work，至可以用一個似樣的估值做IPO。「當然，如果大陸突然鬆章畀佢（李澤楷），入去搞電視出報紙，咁就唔講得笑。」小琴聽到呢位賓架在電話筒另一邊大笑，但係冇問佢笑乜。
小琴同事昨日有致電及傳短信畀小小超，希望佢回應一下，但係截稿前未見回覆。
報料電郵﹕piano@mingpao.com
2024年12月30日 11:09