國美5元老齊撐陳曉

【明報專訊】日前，國美（0493）前主席黃光裕喺獄中逼宮，要求公司踢走現任主席陳曉。呢幾日，黃光裕陣營不斷透過內地傳媒發功，力數陳曉不是。國美現管理層亦開始出招還擊，5名元老級人馬，日前齊齊出聲撐陳曉。

《21世紀經濟報道》話，8月12日國美管理層4名副總裁﹕李俊濤、孫一丁、牟貴先、何陽青，同埋首席財務官方巍，齊齊同傳媒見面撐陳曉。今次係逼宮事件公開後，國美管理層第一次高調亮相。

逐一反駁黃光裕指控

對於黃光裕陣營發布「陳曉無管理國美電器能力」、「陳曉主動接受貝恩投資苛刻條件」等指摘，管理層一一反駁，並表態話陳曉已經獲得絕大多數投資者嘅支持。對於黃氏家族指摘陳曉犧牲企業市場佔有率，大量關閉效益差門店來「做業績」；「粉飾國美報表」嘅指控，總裁孫一丁話﹕「關閉300多間門店的決定是我做出的，參考指標是開店半年內有無盈利，而且即便整改都無盈利。」

對於陳曉選擇條件苛刻嘅貝恩投資，實現一己私利嘅指控，方巍話﹕「黃光裕事發時，國美處於破產邊緣，多家銀行一度停止與我們的合作，現金淨流入為負，還面臨52億港元可轉股債的提前贖回的危機。」佢話，董事局為咗彌補公司資金缺口，先至引入戰略投資者。當時10多家投資機構中，貝恩係唯一答應保護大股東利益嘅投資者，黃光裕家族係最大受益者，而且選擇貝恩係當時董事局共同決定，唔係陳曉一個人嘅主張。

總之，小琴覺得，今日黃、陳兩方透過傳媒互相過招，才啱啱開始，好戲還在後頭。