中移王建宙 訪特首摸錯門

【明報專訊】重磅股中移動（0941）明天（19日）派成績表，原來董事長王建宙一早已到香港，噚日仲現身於中環政府總部，喺嗰度遊咗一輪花園。原來王董約咗同特首曾蔭權會面，不過，就去錯咗政府總部，搞咗一輪，先至上車去禮賓府。香港作為主人家，邀請人哋嚟坐吓，但搞到要位貴賓東撲西撲，認真要講聲唔好意思喇！

話說，王董同一班同事，噚日朝早喺政府總部行嚟行去，小琴大吃一驚，究竟有咩大事件發生，要勞動王董大架光臨？小琴上去問個究竟，王董就話冇嘢講，又話業績要遲幾日先公布。根據港交所資料顯示，中移動周四公布業績，家肯定唔可以爆料。

後來王董同班同事，入咗去政府總部中座，話要搵特首曾蔭權。接待員應該唔識王董，只係話搵特首要去禮賓府，但冇交代禮賓府喺邊度。前任特首董建華以前喺政府總部返工，不過2005年辭職後，由曾蔭權接棒。06年曾特首就搬咗入禮賓府住兼做埋辦公室，所以曾特首好耐冇喺政府總部返工。

王董人生路不熟，當然唔知禮賓府喺邊。不過唔好話王董，就算小琴日日出去採訪，都要諗吓由政府總部行去位於中環上亞厘畢道禮賓府應該點樣行。王董有私家車，當然唔使行啦。見到王董着住套西裝四圍撲，大汗疊細汗咁搵，小琴都唔忍心，提議佢上番私家車，同司機講聲，本港嘅司機應該知道點去禮賓府，王董就上車離開。小琴問番行政長官辦公室，佢哋話王董噚日確實同特首會面，屬於禮節性拜訪。

特首辦：禮節性拜訪

王董管理中移動，有好多機會去不同省市，同當地官員會面。今次嚟到香港見特首會面，遊咗一輪花園至到埗，就當係見識埋香港政府辦公室位置啦。

報料電郵﹕piano@mingpao.com