少林寺港總部 或選址長洲

【明報專訊】多次於經濟低潮入貨、並於高位收割嘅資深物業投資者、經營世紀21添百利物業顧問行嘅何鐵城，噚日同傳媒茶敘，帶記者到佢持有嘅大埔屋地參觀時，透露咗一個大秘密。原來何生原本計劃放售嘅長洲山頂道屋地，少林寺方面正同佢接觸，希望有合作機會，並計劃喺佢長洲間屋嗰度，作為在港總部，教人強身健體。

本身亦曾為香港童軍會會長，經營世紀21添百利物業顧問行嘅何鐵城話，呢幅地喺長洲山頂道，位處高位，環境清幽，屋地面積有成1.2萬方呎，現時有數間屋，涉及樓面約4000多方呎，早喺03年SARS樓市低迷時，曾福琴行或有關人士就賣畀佢，當時成交價都係得百多萬元，原本諗住3000多萬元賣，但近排少林寺接觸佢，話想喺呢度搞個香港總部。記者曾問是否嵩山少林寺？但佢未有正面回應。

曾傳聞少林寺分校選址大嶼山

不過，福建莆田嗰間叫「南少林寺」，所以小琴估何生所講嘅少林寺應該係嵩山少林寺。事關先前都有傳聞話，少林寺想來香港開分校，但選址好似話係大嶼山。不過，至今都只係聞樓梯響。

經常叫大家讀多啲書嘅何鐵成，佢仲話少林寺乃國家重要文化，若有機會嘅話，都可以喺財力上支持佢哋。此外，原來佢仲喺內地有發展培訓學童記憶課程，希望為國家培育更多人才咁話。

報料電郵﹕piano@mingpao.com