變靚D改名「無限創意」 轉搞投資

【明報專訊】城中才子蕭若元胞姐蕭若慈做主席嘅變靚D（8079）控股，又有新搞作。公司原本打算配股抽水2億，但因近期股「市况低迷」而失敗。於是，公司又變陣，決定出售美容業務，未來會集中搞貸款服務、物業投資及證券投資業務，又會將公司改名為「無限創意控股有限公司」（Unlimited Creativity Holdings Limited）。

小琴覺得，變靚D呢個新名，實在係改得好好，並且名副其實，事關一直以來公司嘅發展策略，都好有無限創意影子。

公司雖然本業係做美容，但又有好多新業務，例如先前收購電影業務，又計劃進攻內地銅礦。美容、電影、銅礦，呢三樣風馬牛不相及嘅生意，喺變靚D管理層眼中，卻可以一起搞，咁你話係唔係無限創意？

出售美容業務 料錄虧損

講返今次出售美容業務，公司已同獨立第三者簽約具法律約束力嘅意向書，出售代價438萬元，但有關業務有負債1.84億元，並且截至今年3月底嘅17個月，虧損8300多萬，出售會錄得虧損1200萬元。所出售嘅公司現時主要在香港、中國深圳及廣州經營美容沙龍業務。